Tha cuid nach tèid a chlàradh:
òrain gaoil agus deilbh, duilleagan bho irisean a chaidh an call;
gràinean gainmhich, no duslach, ann an litir bho Phuerto Madrin
no Albainn Nuadh;

ach seo ar bith-beò, latha an dèidh latha:
dath a’ chrom-luis air stampa
bho dhùthaich cèin, gorm a bheir oirnn creidsinn
ann an teàrmainn an adhair; mar a mhaireas an spiorad

air a’ chiad dhuilleig de leabhar no air comharra postaidh
fann; mar a dh’ èalas an sgàile
dhachaidh bho làithean
de mheannt is de dh’ uisge;

agus leantainneachd an astair ann
an còmhnaidh: na lòintean agus na rathaidean mòra
a’ ruith air falbh gu cànan nach cluinnear tuilleadh:

lampa laiste fad na h-oidhche, ann an uinneag chèin air choireigin;
na litrichean air a’ bhòrd;
gràs làimh strainnsear.

De partout jusqu'a vous
translated into Gaelic by Ann Frater