Clàr air a’ bhalla
a’ leantainn slighe gach soitheach air an robh m’ athair:
tarsainn a’ Chuan Siar;
tron Mhuir Mheadhanach
agus sìos tro Chanàl Suez;
a’ Mhuir Ruadh agus a’ Chuan Innseanach,
a’ Chuan Sèimh –
sinn a’ feitheamh gus an tilleadh e
gu eilean a’ Chuain Sgìth.

Dola dhomhsa bho gach dùthaich air an do thadhal e,
iad nan suidhe air an sgeilp mar chuireadh
gu dùthchannan nach fhaca mi
ach anns a’ mhac-meanmna a dhùisg a sgeulachdan.

Na dannsairean Spàinneach
reòite ann an ruidhle Flamenco;
gaucho Argentina air druim an eich dhuibh
far a bheil e air a bhith na shuidhe
fad còrr is fichead bliadhna;
dà chailleach à Seapan air fàs robach
le aois agus droch làimhseachadh
(ged a tha aon tè a tha fhathast àlainn-
a h-aodann geal, a bilean dearg),
an fheadhainn a thàinig à Corea
dathach ann am bucas gloinne.

An saoghal ann an còirnear
de chòirnear beag den t-saoghal,
ìomhaighean a ghluais mo chasan gu siubhal
gus am faodainn mo chuimhneachain fhìn
a chuir air an sgeilp