Sheet fu, a hint-end blaw hurls us tae the Garvellachs,
skiffed by steppin-stane inches. Ginge-broon an strippit,
a hinniebee draps fae heidin oot ower the watter
tae licht oan oor haunbaur. Canny wi guid chances

tae draw braith, thon wandert getherer bides wi the yaucht.
Whin soun alloos, we pit in tae Eileach an Naoimh
whaur gress corries coorie oan crags. Twa three fitfaws
awa, in yin bracken heuch, a watter spout slakes oor drouth

efter saut spume. Nearhaun staun bykes athoot bummles
whaes owerloupit slabs birl intae breist-like humples.
It taks a hale craggy inch tae mak yin hinnie drap.
Saintit, Brendan cam wingin his wey oan yon currach,

sclumbin breckers, skitin spindrift tae fund hamely grund
whaur gowden hinnie-kaims growe, yaisin wax fae thon bee.

Honeybee, Inner Hebrides
translated into Scots by Janet Paisley