jimmy, n.  where’s yir och, where’s yir noo
whit ye got on there underneath yir crivvens
is it funny, is it broad, is it gutter, is it deid

couthie, adj.  bonnie wee, canny wee lochneska
kent that one’s father, hey old school, long zyne
whae’s like us, whae’s nane like us

stane, n.  Anglo Dano Berwick-upon-Inglis
speirin dreich Traprain’s hameless bield
ablow the greet o a North Sea nicht

blether, v.  tae Knesset, Dáil or gurry-wurry
ane that Holyroods, a gab, a clype
endin usu. in owre muckle clapperdin

gallusly, adv.  naebody’s servitor, dominie
o assignations, tutor yir ain dative
vaig on yir ain causey, homologatin nothin

flit, v.  til wale the selkies’ sang
til kist baith kirk and carle, til skolder fate
til handsel the dawin wi a Norseman’s nieve

mair, adj.  mair een, mair wheech, mair hert
mair Glesga, mair Ayr, mair Fife and Català
mair licht, mair luve

ceilidh, n.  tocher o words untrysted
clarsach still as a quaich, slogans fresh dichted
on concrete umbrellas, doon digital glens

clanjamfry, n.  gie us keepie-uppie, Andrew Murray
Daphne Broon, gie us Grieve, gie us gowf,
gonnae no and haste ye back

Hogmanay, n.  alang a Marseilles vennel
in the oor’s last fash, a tassie cowps Fergusson and Dunbar
twa corbies caas as aa the years devals

aye, adv.  whit, que, mah, fit, nein
ou vas-tu, kuinka voitte, nihao, meri makura
och aye, how no, ano, aye, eh, tha, yes