British Council öz tərəfdaşı Junior Achievement (JA) Azərbaycan təşkilatı ilə birlikdə Skills@Work Challenge yarışının milli finalını 27 yanvar 2009-cu il, Grand Hotel Europe mehmanxanasında keçirdi.

Tədbir saat 10.00-da, Bakı zalında başladı və irəli sürülmüş biznes probleminə ən yaxşı həlli təklif etmək üçün bir-biri ilə yarışacaq 100 şagirdlə təmsil olunan 11 peşə-texniki məktəbini bir araya gətirdi.

Skills@Work (skilz-ət-vörk – İş üçün bacarıqlar) bütün Cənub-Şərqi Avropa ərazisi və Böyük Britaniyada peşə təhsili və təlimi sektorunda beynəlmiləlçiliyi dəstəkləyən, on səkkiz ölkəni əhatə edən bir layihədir. British Council və JA Young Enterprise tərəfindən birgə təşəbbüs kimi həyata keçirilən Skills@Work Challenge gəncləri öz bacarıqlarından işgüzar və innovativ formada istifadə etməyə həvəsləndirməklə, son nəticədə onların işə düzəlmək imkanlarını və sahibkarlıq qabiliyyətlərini artıracaq milli və beynəlxalq yarışdır. Builki yarış eyni zamanda Cənub-Şərqi Avropanın doqquz ölkəsi və Britaniyada keçirildi.

Azərbaycanda yarış 2008-ci ilini oktyabrından başlanmış, seçimlərdə Bakı, Sumqayıt, Gəncə, Quba, Mingəçevir və Lənkərandan olan 300-dən çox şagirdin sahibkarlıq və komandada işləmə bacarıqları sınaqdan keçirilmişdir. 27 yanvar keçiriən Finala yüksəlmiş 20 komanda burada biznes ideyalarını işləyib hazırladı və öz həllərini münsiflərə təqdim etdi. Biznes nümayəndələrindən ibarət münsiflər heyəti təklif olunan ideyaları həyata keçirilə bilmə dərəcəsi, yeniliyi və komandanın təqdimat bacarığına əsaslanaraq qiymətləndirdi. British Council Azərbaycanda Skills@Work Challenge yarışının keçirilməsinə sponsor yardımı etdiyinə görə Microsoft şirkətinə minnətdarlığını bildirir.

Ən çox xal toplamış altı komanda böyük finalda "Oturaq işin insan orqanizminə mənfi təsirini azaltmaq üçün hansı məhsulu ixtira edərdiniz?" mövzusunda öz ideyalarını təqdim etdilər və münsiflər heyəti qalib komandaları seçdi:

1. Bülbül adına Orta İxtisas Musiqi məktəbi, 'JAZZeri' komandası
2. Quba Peşə Liseyi, ‘Citizen’ komandası
3. Azərbaycan Dövlət Dəmir Yolu Liseyi, ‘SOONG’ komandası

Birinci yerin sahibləri - Mehran İsmayılzadə, Səttar Orucov, Cavid Orucov , Nicat Abdullayev və Arzuman Allahverdiyev 12 mart 2009-cu ildə Bolqarıstan, Sofiyada keçiriləcək regional Skills@Work Challenge yarışında iştirak etmək imkanı əldə etdi.

“skills@work” layihəsi “İş üçün bacarıqlar” proqramının bir hissəsidir.