İndi keçmişi xatırlayarkən mənə elə gəlir ki, Böyük Britaniyadan qayıtdığım vaxtdan bəri yüz il keçib, halbuki bu yalnız beş il bundan qabaq olub. Çivninq təqaüdçüsü kimi mənim əldə etdiyim təcrübə hədsiz dərəcədə dəyərli idi. Bu təcrübə mənə həyatda yeni istiqamət tapmaqda və başqa bir şəxsiyyət kimi formalaşmaqda yardımçı oldu.

Əgər həyatımı iki mərhələyə ayırmalı olsam, yəqin ki, Çivninqə qədərki və Çivninqdən sonrakı vaxtlar həyatımda seçiləcək. Çünki Çivninq təqaüdünün qalibi olandan sonra həyatım çox dəyişdi. Buna nail olmaq mənim yaşadığım ölkədə heç də hamıya nəsib olmur, ancaq bu hisslər adamı çox həvəsləndirir və sübut edir ki, əgər doğrudan da həyatda nəyə nail olmaq istədiyinə əminsənsə və azla qane olmursansa, istədiyinə çata bilərsən.

Ridinq (Reading) Universitetində təhsil alıb eyni zamanda tələbə yataqxanasında yaşamaq mənə dünyanın müxtəlif ölkələrindən olan insanlarla ünsiyyətdə olmağa şərait yaratdı və bununla dünyanın müxtəlifliklərindən agah olmuş oldum.

Ümumiyyətlə, Britaniyada təhsil almaq mənim üçün çoxlu imkanlar yaratdı. Mən British Council-a və Britaniyanın Xarici İşlər Nazirliyinə mənə təkcə Britaniyada təhsil almaq və Britaniya vasitəsilə dünyanı kəşf etməyə imkan yaratdığına görə deyil, həm də həyatımı dəyişərək öz məqsədlərimə nail olmağa kömək etdiyi üçün minnətdaram.